THAILAND– Ginakabig nga pinoy pride sa subong ang mga manunudlo nga Pilipino sa Thailand matapos sila nagpauli sang kadalag-an sa ginpatigayon nga historic 1st EP/MEP National Open House 2019 Academic Skills Competition sa Satriwitthaya 2 School sa Bangkok, Thailand.
Sa interview sang Bombo Radyo kay Maam Shiere Diadem Lagarto sang Dueñas, Iloilo kag isa man sa Pilipino nga manunudlo nga nakakuha sang kadalag-an sa nasambit nga kompetisyon, iya ginpahayag nga tuman ang iya kasadya bangud sa nabaton niya.
Suno kay Lagarto, wala niya gin ekspektar nga makuha nila ang kadalag-an bangud ini ang ika una nga bes nga nagpasakop ang ila nga ang eskwelahan sa nasambit nga kompetisyon kun sa diin nakuha nila ang kampeonato.
Dugang sang natungdan, nangin madinalag-on sila bangud man sa pangabudlay sang iya mga estudyante sa pag ubra sang Science reasearch nga gin pasakop nila sa National Competition sa Bangkok nag champion sa nasambit nga kompetisyon.
Ginkabig ni Lagarto nga dako nga kadalag-an para sa mga Pilipino nga manunudlo sa Thailand ang nasambit nga kompetisyon bangud kalabanan nga coaches sang mga nagpasakop nga mga buluthuan mga Pilipino.
Samtang gin patpat naman ni Lagarto ang nangin ekperyensya niya sa pagtudlo sa Thailand kag iya nga gin kompara ini sang tyempo na naga tudlo pa sya sa Pilipinas.
Suno kay Lagarto dako ang kinalain sang systema sang Thailand sa Pilipinas kaangay nalang sang mga pasilidad nga mas maayo kag moderno sa mga pampubliko nga eskwelahan sa nasambit nga pungsod.
Dugang pa nga kinalain amo ang mas mamag-an nga ubra sang mga manunudlo didto bangud wala sang madamo nga mga paper works.
Ginsabat naman sang manunudlo ang pamangkot kun pabor bala sya sa gina duso nga No homework Policy sa Pilipinas.
Suno kay Lagarto indi sya pabor sa pagpatuman sang nasambit nga polisiya sa mga buluthaan ini bangud nagapati sya nga ang pagtudlo sa mga kabataan naga umpisa sa pag disiplina kag ang paghatag sang homework isa ka paagi agud ma disiplina ang mga estudyante.
Dugang sang natungdan, kabaylo sang pag atubang sang mga kabataan sa ila mga tagsa ka cellphones mas maayo kun gamiton nila ang ila nga tiyempo sa pagtuon kag pag ubra sang ila mga homeworks bangud ini man ang makabulig sa ila nga mas mangin maayo sa eskwelahan.
