ILOILO– Napasar na ang resolusyon nga maga bulig sa mga mangunguma sa probinsya sang Iloilo nga apektado sang pagnubo sang presyo sang humay.
Sa interview sang Bombo Radyo kay Board Member Rolito Cajilig, chairman sang Committee on Agriculture iya ginpahayag ang nasambit nga resolusyon ang gin balay sang Committee on Agriculture kaupod ang National Food Authority kag iban pa nga mga stake holders sa ginpatigayon nga committee hearing sa Sanguniang Panlalawigan sang Iloilo.
Una nga resolusyon amo ang naga hingyo sa kongreso nga bag-uhon ang pila ka mga probisyon sang Rice Tarrification Law.
Ika duha nga resolusyon amo ang nagamando sa National Food Authority nga magpahamtang sang mga mobile buying station sa mga munisipilidad sa probinsya sang Iloilo sa bulig man sang Local Government Unit kag Provincial Government.
Ikatatlo amo ang nagamando sa Local Government sa bilog nga Iloilo nga nagakadapat nakalakip sa ila nga Annual investments ang para sa programa sa humay kag mangunguma agud mas madasig nga mahatagan sang solusyon ang mga kaangay nga problema.
Ikaapat nga resolusyon, nakadapat nga dugangan sang Provincial government kag Local Government ang pondo sang departamento sang agrikultura sa mga banwa.
Sa subong, ginatinguhaan na nila nga bag-o matapos ang bulan sang Setyembre, makapadulong na ang National Food Authority sa mga banwa sa probinsya agud mamakal sang humay sa mga mangunguma.
Ginapreparar naman ni Iloilo Governor Arthur Defensor ang supplemental budget nga pagagamiton sa pagbakal sang mga humay apang indi pa niya mapat-ud ang eksakto nga presyuhan sang humay kun ini ang baklon sang National Food Authority bangud nakadepende ini sa maaprobahan nga pondo.
