ILOILO CITY- Ginkondena ni Iloilo City Mayor Jerry P. Treñas ang social experiment nga ginhimo sang mga Grade 12 students sang isa ka buluthuan bilang kabahin sang ila nga output sa isa nila ka subject.
Ini natabo sa isa ka fast food chain sa mall sa Diversion Road, Mandurriao, Iloilo City.
Suno kay Mayor Treñas, wala siya nanamian sa ginbuhat sang mga kabataan bangud nga indi husto nga himuon ini sa pampubliko nga lugar apisar nga ini ang kabahin pa sang isa ka experiment sa eskwelahan.
Nadismaya man ini sa professor sang mga kabataan sa iya nga pagpahanugot nga himuon ang nasambit nga butang.
Dugang pa sang alkalde, kuntani ginhimo anay sang propesor ang nasambit nga social experiment kun masarangan niya.
Sa pihak sini sunu sa alkalde, indi na niya gusto nga maliwat ang nasambit nga mga buluhaton.
Gintugyan na sang alkalde kay Mr. Nestor Canong, pinuno sang task force on Moral and Values Formation ang nasambit nga isyu.
Suno naman kay Task force on Morals and Values formation nga si Mr. Nestor Canong, nabutang sa kompromiso ang mga kabataan bangud ginabuyayaw kag ginpakamalaot sila sang mga netizens.
Dugang pa niya, nahuy-an man ang mga ini bangud hayag gid nga nakit-an ang ila nga lawas kag ila nawong ilabi na nga mga menor de edad ang mga ini.
Nagpadala na sang sulat ang alkalde sa eskwelahan kag sa fastfood chain sa sulod sang mall sa Mandurriao agud nga kuhaon ang ila nga sabat nahanungod sa insidente.
