ILOILO CITY–Ginaduso ni Iloilo City Councilor Lyndon Acap ang compensatory time ukon compressed work-week arrangement nga nagapahanugot sa mga empleyado nga maka-overtime agud mapanubo ang oras sang pag-trabaho sa masunod nga adlaw ukon kon san-o nila gusto.
Sa interview sang Bombo Radyo Iloilo kay Acap, iya ginpahayag nga plano niya nga himuon ini nga ordinansa sa diin pwede na maka-obra sang masobra walo ka oras ang mga empleyado.
Suno kay Acap, temporaryo lang ini nga mangin epektibo sa Iloilo City Hall, apang posible nga ipasar para mapatigayon sa mga empleyado sang gobyerno kag mga pribado nga sektor.
Dugang sang natungdan, ginahulat pa subong nga mapirmahan sang Presidente ang Senate Bill 1571 ukon mga amendment nga ginhimo para sa Labor Code.
Kon mahimo na nga layi ang amo nga hagna, wala na sang malapas ang pag-overtime bangud ginapahanugutan naman ini sang Civil Service Commission kag sang Department of Budget and Management.
Nagapati si Acap nga kon mapatigayon ang amo nga ordinansa, daku ang mabulig sini agud mahatagan ang tagsa ka empleyado sang mas madamo nga tion nga matatapan ang ila pamilya, ilabi na subong nga mataas ang record sang pagpanginmatay kag depression sa Iloilo.
Dugang ni Acap, isa man ini ka paagi agud mapahagan-hagan ang traffic sa syudad kag mahatagan pagtamod ang economic value sa tagsa ka obra, sa diin ginapahanumdom nga kon oras ang gin-utang, oras man ang ibayad.
Iya man ginpasigurado nga indi ini mangin sablag sa mga transaction sa gobyerno, bangud may ara man sang pagbulos-bulos sa mga trabaho ang mga empleyado.
