ILOILO – Nangin madinalag-on ang ginpatigayon nga National Simultaneous Earthquake Drill sa Iloilo Provincial Capitol.
Sa interview sang Bombo Radyo kay Iloilo Governor Arthur Defensor Jr., iya ginpahayag nga nangin prayoridad subong sang provincial government ang Disaster Response and Management matapos man ang nagluntad nga asud-asud nga linog sa Mindanao.
Suno sa Gobernador, importante ang ginapatigayon nga drill agud mangin handa kag preparado ang mga Ilonggo kun may magluntad nga kalamidad ilabi na ang linog.
Dugang sang natungdan, handa naman ang provincial government nga mag responde sa tion sang emerhensya bangud naplantsa na nila ini sang una palang kaangay nalang sang pag procure sang mga kinahanglan kun may kalamidad.
Nakig angot naman sila sa Disaster Risk Reduction and Management Council, kun sa diin gina usisa nila ang mga kapasidad sang mga miyembro sini nga mag responde sa tion sang emerhensya.
Gin ako naman sang Gobernador nga kinahanglan man iparepair ang building sang Provincial Capitol bangud sa iya pag inspeksyon may yara sang mga cracks nga nakita apang nagpasalig si Defensor nga safe ang structucal integrity sang nasambit nga establisyemento.
