ILOILO – Nagdugo kag lunsay nabuklan ang ulo ka tatlo ka mga estudyante sang Jaro National High School matapos nga ginpulpog sang microphone sang ila nga trainer.
Ang mga biktima ginkilala sanday Alyas Toto, Alyas Nonoy kag Alyas Tata miyembro sang Tribu Salugnon nga representate sang nasambit nga eskwelahan para sa paalabuton nga Dinagyang Festival 2020
Samtang ang trainer naman ang ginkilala nga si Totchie Vergara.
Sa interview sang Bombo Radyo kay Alyas Toto, isa sa mga biktima iya ginpahayag nga naakig si Vergara sa ila bangud nagsaka sila sa ikaduha nga panalgan sang isa ka building sa eskwelahan matapos sini isa-isa nga ginpulpog sang microphone ang ila nga ulo.
Suno kay Alyas Toto, nakibot lang sila sa ginhimo sang trainer bangud wala man sila sang ginhimo nga sala.
Dugang sang natungdan, indi lang ini ang ika una nga bes nga nanakit si Vergara sa mga miyembro sang tribu bangud ini na ang nakaandan niya nga paagi agud disiplinahon ang mga estudyante.
Gilayon naman nga nagpadulong ang Jaro PNP kag Women and Children Protection Desks sang nasambit nga estasyon sa Jaro National High School kun sa diin nagapadayon ang pag ensayo sang tribu agud makuha ang pahayag ni Vergara.
Sa subong padayon pa nga ginadiskusyunan sang kapulisan, pamunuan sang nasambit nga eskwelahan, ginikanan sang mga biktima kag sang trainer ang nasambit nga insidente.
