NEPAL– Nakakita ka na bala sang beauty pageant nga indi tawo ang contestants kundi sapat?
Sa Nepal, ginapatigayon ang isa ka pinasahi nga beauty contest sa diin ang contestants indi tawo kundi elepante.
Natural ginapagwapahan ang mga elepante,naka make-up,mapula-pula ang guya, naka- polish ang mga malapad nga kuko,nga kaangay sang isa ka matahum nga dalaga, nga elepante.
Ini nga contest ang ginpatigayon sa Chitwan district, puluy-an sang pinakaimportante nga conservation area kag tourist destination humalin sang 2004.
Magluwas diri, nagaintra man ang mga elepante sa football, polo kag palumbaanay dalagan kag may picnic pa sa diin sila ang ginapakaon sang saging kag tubo.
Suno kay Deepak Bhattarai, chairman sang local hotel association nga nag organisa sang festival, sila ang nagatuyo nga i- highlight ang relasyon sang elepante kag tawo kag mangin mas “elephant friendly” kada tuig.
Apang suno naman sa local Animal Rights Club, ila ginpakamalaot ang nasambit nga kahiwatan bangud sa pagpang-abuso sa mga sapat.
Sila nagpanugyan kag dapat magfocus nalang sa local culture kag indi na paghilabtan ang mga elepante.
Matandaan nga may popular event man sa Nepal nga elephant polo championships nga gin untat sang 2016 bangud sa isyu tuhoy sa indi husto nga pagtrato sa mga sapat.
