ILOILO – Nagaduda ang otoridad sa nagluntad nga pagpangransak sa isa ka balay sa Brgy. Balabag Pavia, Iloilo sa diin ginapahayag P4 ka milyon nga kwarta kag P100,000 nga balor sang alahas ang nataban.
Ang biktima ginkilala nga si Yenie Bakial, 41 anyos kag isa ka maugpautang sa amo nga lugar.
Sa interview sang Bombo Radyo kay Pol Maj Jojo Tabaloc, hepe sang Pavia Municipal Police Station iya ginpahayag nga naga duda sa balor sang kwarta nga gindeklara sang biktima nga nataban sang suspek.
Suno kay Tabaloc, daw ka imposible nga may yara sang tuman ka dako nga balor sang kwarta nga gina tago ang biktima.
Dugang sang natungdan, isa pa sa ginadudahan nila amo ang kapasidad sang biktima nga mag angkon sang nasambit nga balor sang kwarta bangud man sa financial background dugang pa nga may kaso ini nga Illegal recruitment.
Sa subong, ginahulat nila ang supporting documents sang biktima agud pamatud an niya ang ginapahayag niya nga balor sang kwarta nga nataban sang suspek.
Samtang, madamo naman nga posibilidad ang gina tan-aw sang mga kapulisan kun paano nakasulod kag natigayon nga mataban sang suspek ang kwarta nga nasulod sa isa ka attache case samtang ang alahas naman ang nabutang sa idalom sang double deck.
Isa na diri amo ang posibilidad nga may yara sang inside job sa krimen bangud daw kaangay nga saulado sang suspek ang balay kag naka agi na ini nga sulod.
Dugang pa ang tuman ka pigado nga seguridad sang balay sang biktima sa diin madali lang buksan ang pwertahan kag bintana.
Santo sa pahayag ni Tabaloc, may yara na sila sang person of interest apang indi pa nila ma identify ang identity bangud ang paggwa lang sang suspek nga sakay sang motor ang nakuhaan sang Closed Circuit Televison.
Ginpahayag naman sang biktima nga indi niya kilala ang suspek nga nakuhaan sa Closed Circuit Television.
Padayon naman ang ginapatigayon nga imbestigasyon sang kapulisan sa nasambit nga krimen.
