ILOILO – Nagapabilin nga kalmado ang mga Cebuano, ini sa pihak sang paganunsyo sang Department of Health nga may yara sang gina obserbahan nga isa ka 5 tuig nga bata nagikan sa Wuhan, China nga may yara sang mga simtomas nga kaangay sang Coronavirus nga naka admit sa isa ka ospital sa Cebu City.
Sa interview sang Bombo Radyo kay Lene Losbañes, isa ka nurse sa Mandaue, Cebu iya ginpahayag nga ginmanduan na sang City government sang Cebu ang mga pumuluyo nga magsuksok sang mask kun magkadto sa pampubliko nga lugar kaangay sang mga malls.
Suno kay Losbañes, hugot man nga ginapatuman ang pagsunod sang proper hygeine agud malikawan nga maapektuhan sang nasambit nga virus.
Sa subong, suno sa natungdan wala pa sang dugang nga mga panugyan sa ila sa ospital kun ano ang mga lihok nga mahimo nila patigayunon sa tion nga may yara sang pasyente nga mag positibo sa Coronavirus.
Nahibaluan nga una na nga ginmandu ni Cebu Governor Gwen Garcia ang pagpaidalom sa 14 ka adlaw nga quarantine sa mga pasahero nagikan sa China lakip man ang Hong kong kag Macau.
Samtang ginpabalik naman ang mga incoming flights nagikan sa nasambit nga mga pungsod.
