ILOILO – Ginpatigayon kahapon nga adlaw ang Pre-Disaster Risk Assessment meeting natuhoy sa pagpanghanda sang mga ahensya sa 2019 Novel Coronavirus scare sa pungsod nga ginpangunahan ni Office of Civil Defense 6 Director Roberto Nuñez kaupod man ang mga tiglawas sang Department of Health, Philippine Coastguard, City Health Office, Provincial Health Office, Department of Social Welfare and Development, Philippine Ports Authority, Department of Interior and Local Government, Civil Aviation Authority of the Philippines, Department of Tourism, Department of Science and Technology, Philippine National Police kag Bureau of Quarantine kag pila ka miyembro sang Provincial Disaster Risk Reduction and Management Office, Municipal Disaster Risk Reduction and Management Office kag City Disaster Risk Reduction and Management Office sa syudad sang Iloilo.
Kadungan sang pagpatigayon sang Pre-Disaster Risk Assessment, ginplastar sang mga nagkalain-lain nga ahensya ang ila mga problema sa pagimplementa sang tagsa nila ka mga lihok kag inisyatibo sa pagtapna sang Novel Coronavirus.
Sa diin una nga nagpasalig ang Department of Health nga mahimo ireport sa ila ang mga ospital nga nagadecline sang mga ginadala nga pasyente nga apektado sang nasmabit nga virus kag ila ini nga ipatawag.
Naghingyo naman sang Information, Education and Communication materials nga naka sulat sa English agud mas ma intindihan sang mga turista kag mahimo nga ipahamtang nila sa mga tourist destinations.
Naghatag man sang suhestiyon si Dr. Roland Jay Fortuna, Medical Officer sang Iloilo City Health Office kag focal person sang Coronavirus mga magpaytigayon sang orientation sa Municipal Disaster Risk Reduction and Management Office natuhoy sa proper handling sang mga persons uner investigation sa nasambit nga virus agud wala sang mangin delay sa pagresponde.
Matapos ang pagsinapol nahisugtan sang Department of Health nga magpatigayon sang ila kaugalingon nga pagsinapol agud istoryahan ang mga dugang pa nga lihok nga mahimo nila patigayunon.
Sa interview sang Bombo Radyo kay Director Roberto Nuñez, sang Office of Civil Defense 6 iya ginpahayag nga magatukod sila sang Incident Management Team nga posible iactive buwas nga amo ang maga monitor, responde kag maga rescue sa mga naapektuhan sang NCov.
Suno kay Nuñez isa man sa mga problema amo ang limitado nga infectious unit sa diin ipahamtang ang mga infected patients.
Gani nagpasalig ang natungdan nga may yara sang ipahulam nga Regional Multi Purpose Evacuation centers ang Office of Civil Defense 6 nga mahimo magamit nga quarantine holding area.
