ILOILO – Padayon nga ginamonitor sang Department of Trade and Industry ang presyo sang mga medical supplies sa syudad kag probinsya sang Iloilo.
Ini matapos ang pila ka reports nga may yara sang pagtaas sang presyo sang mask sa pila ka mga botika.
Sa interview sang Bombo Radyo kay Felisa Judith Degala,Officer Incharge sang Department of Trade and Industry iya ginpahayag nga sa ila pag monitor sa mga medial supplies sa syudad, sa subong wala pa sila sang nakita nga naglapas sa gintalana nila nga presyuhanay.
Suno kay Degala, apisar nga may yara sang pagtaas sang presyuhanay sa alcohol nagkalain-lain naman ini nga klase kag brands.
Dugang sang natungdan, ang madakpan nga naglapas kag nagpasaka sang presyo sang mga medical supplies kaangay sang mask kag alcohol ang magapangatubang sang nagaka igo nga silot.
Ginaathag ni Degala nga nagabulig lang ang Department of Trade and Industry sa pagmonitor sang presyuhanay sang mga medical supplies nga yara sa listahan nga ginhatag sang Department of Health.
Gani ang Department of Health sa gihapon ang may katungdanan nga maghatag sang silot sa sinuman nga madakpan nga naglapas sa nasambit nga pagsulundan.
Santo sa pahayag ni Degala, sa ila paglibot sa mga botika wala na sila sang nakita nga may yara pa sang stock sang mask.
