ILOILO – Naplastar na ni Iloilo Governor Arthur Defensor Jr., ang executive order nga magadumili sa pag-import sang baboy nga halin sa Davao nga nagpositibo sa African Swine Fever.
Sa interview sang Bombo Radyo kay Iloilo Governor Arthur Defensor Jr., iya ginpahayag nga wala pa niya napirmahan ang nasambit nga executive order bangud ginahulat niya ang kumpirmasyon gikan sa Veterinary Office tuhoy sa luyag niya mahibaluan nga detalye may kaangtanan sa African Swine Fever sa Davao.
Sa pihak sini, ginpahayag ni Defensor nga nakahanda ang Iloilo Provincial Government sa monitoring agud nga indi makalab-ot sa probinsya ang nasambit nga balatian.
Sa una nga executive order nga ginpaguwa sang gobernador nga nagadumili sa pagpasulod sang swine, pork kag pork products gikan sa Luzon, ini ang nangin epektibo sa pagtapna sang paglapta sang African Swine Fever.
