ILOILO – Ginako sang Department of Social Welfare and Development nga madamo pa sang Senior Citizens nga wala nakabaton sang ila pension humalin sang 2019.
Ini matapos ang sunod-sunod nga reklamo sang pila ka mga senior citizens, sa diin ang iban sa ila ang wala pa nakabaton sang pension nga nagdangat na sa anum tubtob walo ka bulan.
Sa interview sang Bombo Radyo kay Mae Castillo, Public Information Officer sang Department of Social Welfare and Development 6 iya ginpahayag nga ang pagka delay sang pagrelease sang pension sang mga Senior Citizen amo bangud sa ginpatigayon nila nga revalidation sang gintalikdan nga tuig.
Suno kay Castillo, gina proseso na nila subong ang mga nabilin nga Senior Citizens nga wala pa nakabaton sang pension humalin sang 2019 kag ginalauman nga matapos sa 1st quarter 2020.
Nagpaathag ang natungdan nga sila mismo ang nagarelease sang pension sang mga senior citizens gani wala sang kaangtanan ang Local Government Unit, Municipal Social Welfare and Development kag talatapan sang Mayor sa kada banwa gani indi mahimo nga mabasol sila kun may matabo nga delay.
Dugang sang natungdan, bukas ang ila nga linya sa mga luyag makig-angot kag magpamangkot sa ila natuhoy sa delayed pension sa diin mahimo sila nga malab ot sa ila nga telephone number nga 033-337-6221 ukon magbilin sang mensahe sa ila mga email address fo6@dswd.gov.ph kag official facebook page.
