JAPAN – Nakapanaog na ang pila ka mga pasahero sang Diamond Princess cruise ship matapos nga mag negatibo sa COVID-19.
Una na nga ginpapanaog ang mga tigulang nga pasahero apang magapaidalom sila sa gihapon sa duha ka semana nga quarantine sa tion nga makabalik sila sa ila tagsa ka mga pungsod.
Nakatalana man nga manaog ang 500 ka mga pasahero nga yara sa pa barko sa Biyernes.
Samtang may yara naman sang 79 nga dugang nga kaso sang COVID-19 ang na monitor sa mga pasahero nga nabilin sa barko.
Suno sa Princess Cruises company, nagpadulong sa Japan ang presidente sang kompanya kaupod ang pila ka matag-as nga opisyal agud magpalab-ot sang bulig sa ginpatigayon nga disembarkation process.
Nakahanda man ang kompanya nga maghatag sang refund sa tanan nga gastos kag mga galastuhon pa sang mga pasahero lakip man ang transportation cost.
Madumduman nga ginpaidalom sa quarantine ang Diamond Princess cruise ship nga may sakay nga 3,700 ka mga pasahero kag tripulante sang Pebrero 5.
Suno naman sa Japan Health Ministry, kuhaon nila ang tanan nga contact information sang mga pasahero nga nag negatibo sa nasambit nga balatian agud mahatagan sila sang instructions sa mga nagakadapat nila nga himuon sa tion nga maglain ang ila pamatyag.
Samtang, ginkumpirmar sang Department of Foreign Affairs nga nakarekober na ang ika labing una nga Pilipino nga tripulante sang Diamond Princess cruise ship nga nagpositibo sa COVID-19.
Nalakip man ang nasambit nga Pilipino sa mga pasahero nga ginpapanaog na kahapon.
Sa subong padayon pa nga ginabulong ang 42 pa ka mga pilipino nag nagpakita sang simtomas sang coronavirus nga tripulante sang nasambit nga barko.
Nahibaluan nga may yara sang 538 ka mga Pilipino nga tripulante ang Diamond Princess lakip ang mga nagpositibo sa nasambit nga virus.
Nakig angot na ang Philippine Embassy sa Japan sa mga otoridad kag tagdumalahan sang Princess Cruises agud tapuson na ang detalye sa plano nga pagrepatriate sa mga Pilipino nga crew members kag pasahero sang barko.
