ILOILO CITY- Ginpasalamatan ni Pol. Lt. Col. Jovie Espenido ang pamunuan sang Philippine National Police sa pagpanguna ni Police Chief Gen. Archie Gamboa bangud sa ginhatag nga adjudication process sa iya.
Ini ang may kaangtanan sa pagkadalahig sang iya ngalan sa narco list sang gobyerno.
Sa interview sang Bombo Radyo kay Police Lt. Col. Jovie Espenido, iya ginpahayag nga nagapasalamat siya sa tyansa nga ginhatag sa iya sang pamunuan sang kapulisan nga mahibaluan kun matuod nga may yara siya sang kahilabtanan sa isyu sang iligal nga droga.
Suno kay Espenido, nalipay man siya bangud sa ginpakita nga suporta sa iya ni Presidente rodrigo Duterte.
Pahayag pa ni Espenido, nagapangayo siya sang pasaylo kay Police Chief General Archie Francis Gamboa kag kay Presidente Duterte bangud nagpatigayun siya sang Press Conference apisar may yara na sang gag order.
Sa tion nga yara ang imo ngalan sa listahan sang kapulisan suno kay Espenido, verified na ini, bangud nagapakig-angot sa iban nga mga intelligence agency ang kapulisan agud masigurado ang background sang mga persona nga nalakip.
Magluwas sa pangalan niya nga nakataya suno sa opisyal, dala man niya ang ngalan sang Philippine National Police.
Posible nga politiko ukon ang isa man ka katapo sang kapulisan suno sa iya ang nagdalahig sang iya ngalan sa narco list kag 90% ang posibilidad nga gobyerno ang nagdalahig sang iya ngalan.
Wala man siya sang mahimo suno sa natungdan bangud ordinaryo lang siya nga police officer kag indi niya ginapanag-iyahan ang Philippine National Police.
