ILOILO – Ginaplano sang Iloilo City Government nga dugangan sang apat pa ka mga police stations ang syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga tinghuaan niya nga himuon nga 10 ang police station sa palibot sang syudad sang Iloilo antes matapos ang iya nga termino.
Suno kay Treñas, ang apat ka mga lugar nga iya ginatan-aw nga pahamtangan sang dugang nga mga police stations amo ang Calumpang, Bitoon, Sambag, kag Bo. Obrero.
Dugang sang natungdan, paagi sa pagtukod sang dugang nga mga police station sa dalagko nga mga lugar nga may dako man nga populasyon mas mapalapit kag mas mapadasig ang paghatag serbisyo sa mga pumuluyo ilabi na sa tion sang emerhensya.
Nahibaluan nga sa subong may yara na sang anom ka mga police station sa syudad sang Iloilo nga amo ang Iloilo Police Station 1 sa City Proper, Iloilo Police Station 2 sa Lapaz, Iloilo Police Station 3 sa Jaro, Iloilo Police Station 4 sa Molo, Iloilo Police Station 5 sa Mandurriao kag Iloilo Police Station 6 sa Arevalo.
Samtang, gina tun-an pa ni Iloilo City Police Office Director Pol Col Eric Dampal ang kahimtangan sang anum ka mga Police Station sa syudad sang Iloilo gani indi pa siya makahatag sang pahayag may kaangtanan sa plano ni Mayor Treñas.
Suno kay Dampal, makonsulta pa siya sa iya nga Supply Officer may kaangtanan sa sitwasyon sang mga Police Station.
Ini bangud sa iya man paglibot nakita niya nga madamo pa sang nagakadapat nga kaayuhon sa mga estasyon.
Sa subong padayon pa nila nga gintun-an kun bala makaya pa nga magtukod sang dugang nga apat ka mga estasyon.
