ILOILO – Mas hugton sang Iloilo Provincial Government ang mga lihok nga ila ginapatigayon agud malikawan nga magsulod ang COVID-19 sa probinsya.
Ini bangud sa madasig nga pagsaka sang kaso sang COVID-19 sa South Korea sa diin isa sa mga dumuluong nga masami nagabisita sa Iloilo amo ang nagikan sa nasambit nga pungsod.
Sa interview sang Bombo Radyo kay Iloilo Governor Arthur Defensor Jr., iya ginpahayag nga mas ginpasangkad ang mga lihok nga ila ginapatigayon sa bulig man sang Iloilo City Government agud protektahan ang mga pumuluyo batok sa nasambit nga virus.
Una diri amo ang pagkansela sang isa ka religious event nga Run for Jesus bangud isa sa mga ginaekspektar nga bisita amo ang pila ka mga Korean nationals.
Ika duha amo ang pagpapanaog sang Executive order sang Executive Order ang Iloilo City Government kag Iloilo Provincial Government may kaangtanan sa suspension ukon kanselasyon sang tanan nga public gathering humalin sa bulan sang Pebrero tubtob Marso kag ini ang gilayon nga igahanda sang City Legal Office, City Mayor’s Office kag City Health Office.
Suno kag Gov Defensor, magapaidalom man ang mga Korean Nationals nga yara subong sa syudad kag probinsya sa kaangay nga quarantine measures nga ginpatigayon sa mga nagikan sa China, Hongkong kag Macau.
Nagpasalig ang gobernador nga wala sang nagakadapat ikahadlok kag ikabalaka bangud padayon na nila nga gina monitor ang sitwasyon sang COVID-19 sa probinsya.
Ginkumpirma naman ni Defensor nga may yara na sang nadugang nga Person’s under investigation apang wala lang niya gintuad ang eksakto nga numero.
