Nagpasalamat ang tagdumalahan sang ABS-CBN sa pagbaton ni Presidente Rodrigo Duterte sa ila “apology” sa nangin kapaslawan sang ila network nga mahimo nakasakit sa balatyagon sang presidente.
Makig-angot man sila sa opisina sang presidente may kaangtanan sa pagdonar sang gintanyag nila nga refund para sa iya unaired ads sang nakaligad nga eleksyon.
Nagpasalig ang nasambit nga network nga tinghuaan nila nga mangin mas pasangkaron pa nila ang mga programa nga ila ginapatigayon agud makahatag sang mas maayo nga serbisyo sa pumuluyo.
Samtang suno naman sa Office of the President, indi na kinahanglan pa nga makig-angot sila sa ABS-CBN may kaangtanan sa pagdonar sang refund ni Presidente Duterte bangud nahatagan na sila sang “blanket authority”.
