Nagtuga sang kakugmat ang panibag-o nga kaso sang misteryoso nga sahi sang Coronavirus Disease 19 (COVID)-19 sa Estados Unidos.
Ini bangud nga wala sang travel history ang mga nagpositibo nga pasyente gikan sa California, Oregon kag Washington State sa ano man nga pungsod nga apektado sang COVID-19.
Suno sa World Health Organization, nagdangat na sa 59 ang kaso sang Coronavirus sa Estados Unidos kag suno sa Health officials gikan sa Santa Clara County sa California, isa ka tigulang nga babayi ang nagpositibo sa COVID-19 nga wala sang travel history sa ano man nga pungsod nga apektado sang nasambit nga balatian.
Ang panibag-o nga kaso ang nagapamatuod lang sang community transmission apang indi pa mapat-ud kun tubtob sa diin ini magadangat.
Suno sa health officials sa Oregon, isa ka empleyado sang eskwelahan sa Clackamas County ang nagpositibo sa virus samtang isa naman ka high school student sa Washington State ang nalatnan.
