ILOILO – Gina monitor na sang Local Government sang Calinog, Iloilo ang mga Korean national nga nagatrabaho sa Mega Dam Project sa nasambit nga banwa.
Sa interview sang Bombo Radyo kay Calinog Mayor Francisco “Ico” Calvo, iya ginpahayag na tsekyar na nila ang 100 ka mga Korean National nga naga trabaho sa nasambit nga proyekto kag lunsay nag negatibo sila sa Coronavirus Disease 2019.
Suno kay Calvo, ginatutukan man nila ang mga dugang pa nga mga Korean national nga nag-abot sa ila nga banwa.
Dugang sang natungdan, may yara na siya sang gindesignar nga task force nga amo ang maga tsekyar sa sitwasyon sang mga Koreano sa banwa sang Calinog.
Nagpasalig ang alkalde sa mga pumuluyo sa ila nga banwa nga ginasigurado nila nga mangin hilway ang Calinog sa pagpamahog sang COVID-19.
Samtang, naga-ugyon naman si Mayor Calvo sa ginpapanaog nga memorandum ni Iloilo Governor Arthur Defensor Jr., may kaangtanan sa pagpa-iway sang mga dalagko nga events kag pagtililipon kaangay nalang sang fiesta.
Santo sa pahayag sang natungdan, nakatalana man siya nga makigsapol sa mga manunudlo sa ila nga banwa agud istoryahan ang may kaangtanan sa pagpatigayon sang graduation sang mga estudyante.
