ILOILO CITY – Nagsugod na subong nga adlaw ang pagapatuman sang border restrictions ukon travel restrictions sa probinsya sang Iloilo.
Sa interview sang Bombo Radyo kay Iloilo Governor Arthur Defensor Jr., liwat niya nga ginpatpat ang kaundan sang nasambit nga mandu.
Una diri amo ang mga exemptions sa pagsulod kag paggwa sa probinsya sang Iloilo nga amo ang mga ang mga empelyado nga halin sa trabaho kag luyag na nga magpauli, health workers, auhtorized government officials, ang mga may yara sang medical kag humanitarian reasons, mga naga-deliver sang pagkaon kag bulong, skeletal workforce sang gobyerno may kaangtanan sa Coronavirus Disease 2019.
Suno kay Defensor, may yara man sang pila ka butang nga gindugang sa mandu isa na diri ang pagpahanugot sa mga taga probinsya sang Guimaras sa pihak sang ginpatuman nga border restrictions.
Ini bangud ginakabig sang gobernador nga kabahin na sang Iloilo ang probinsya sang Guimaras.
Dugang sang natungdan, magapadayon man ang pagsulod sang supplies kag deliveries sa probinsya sang Iloilo.
Indi naman pagtugutan nga magsulod ang mga nagikan sa iban nga probinsya agud malikawan nga maglapta pa ang nasambit nga balatian.
