Padayon nga nagasaka ang kaso sang COVID-19 sa Thailand.
Suno kay Bombo International Correspondent Cleo Rose Jondonero, nagpagwa na sang mandu ang Ministry of Education sa Thailand may kaangtanan sa pagsugod sang klase sa maabot kun tani nga Mayo bangud sa padayon nga pagsaka sang kaso sang nasambit nga balatian sa pungsod.
Suno kay Jondonero sa baylo nga sa Mayo halinun na ini sa hulyo apang sa tion nga indi sa gihapon masolbar ang problema sa COVID-19, posible nga magapatigayon nalang sang online classes subong nga school year.
Dugang sang natungdan, padayon man ang pagpatuman sang curfew nga nagasugod sa alas 10:00 sang gab-i tubtob alas kwatro sa aga.
Santo sa pahayag ni Jondonero, suspendido naman ang byahe sang mga bus kag van padulong sa nagkalain-lain nga probinsya sa nasambit nga lugar.
Ginpasarado naman ang mga establisyemento komersyal kag ang mga nagabaligya nalang sang essential good ang nagapabilin nga bukas.
Nahibaluan nga sa subong may yara na sang 2,258 nga kabilugan nga numero sang positibo nga kaso sang COVID-19 sa Thailand sa diin 824 diri ang naka recover na, 1,407 ang nagapibilin sa ospital kag padayon nga ginabulong, 27 naman ang ginbawian na sang kabuhi.
