Gin-ako sang Department of Health nga tuman pa ka temprano nga hambalon nga nagnubo na ang numero sang mga naapektuhan sang COVID-19 sa pungsod.
Ini sa pihak sang mas manubo nga numero sang nagpositibo kag napatay bangud sa nasambit nga balatian sa mga nakaligad nga inadlaw.
Suno sa special assistant ni Department of Health Sec. Francisco Duque nga si Dr. Beverly Ho, posible nga sa tunga ukon katapusan pa sang Abril makit-an ang epekto sang ginpatuman nga isa ka bulan nga Enhanced Community Quarantine sa Luzon.
Sa subong, nagdangat na sa 106 ang pinaka bag-o nga kaso sang nagpositibo sa COVID-19 kag naglab-ot naman sa 3,870 ang kabilugan nga numero sang mga kaso nga narecord sang Department of Health.
Nagnubo man ang nadugang nga reported death nga lima lang samtang 12 naman ang nag-ayo na.
Nahibaluan nga yara na sa 182 ang kabilugan nga numero sang nagkalamatay bangud sa COVID-19 sa pungsod kag 96 naman ang naka recover na.
Dugang pa sang Department of Health, bangud na-extend tubtob sa katapusan sang bulan ang Enhanced Community Quarantine, may tion pa ang pungsod nga malagas kag malab-ot ang duha ka importante nga katuyuan sang quarantine ini amo ang mapahinay ang transmission kag paglapta sang COVID-19 lakip man ang pagpasangkad sang healthcare capacity sang pungsod.
