Mahimo na nga ma avail sang mga magagmay nga negosyante nga apektado sang COVID-19 pandemic ang gintanyag nga pautang sang gobyerno pagkatapos sang quarantine period.
Suno kay Department of Trade and Industry Secretary Ramon Lopez, P5,000 tubtob P200,000 ang mahimo nga mahulam sang mga nagapanag-iya sang micro business kag P200,000 tubtob P500,000 naman para sa mga nagapanag-iya sang magagmay nga negosyo.
Dugang sang natungdan, 0.5% lang ang interes kada bulan ukon 6% kada tuig ang mahimo nila nga bayran sa sulod sang duha tubtob lima ka tuig.
Magluwas diri, ginpahayag man ni House Speaker Alan Peter Cayetano nga may yara pa sang iban nga programa nga ginapreparar ang gobyerno para sa mga magagmay nga negosyante sa diin nagdangat sa P35 bilyon ang gintalana nga pondo.
