ILOILO CITY-Ginpadal-an na sang notice of revocation business permit sang Business Permit and Licensing Office ang Panay Electric Company.
Nagpamalibad nga maghatag sang recorded interview si Business Permit and Licensing Office head Norman Tabud apang suno sa iya, wala pa sang opisyal nga lihok ang Iloilo City Government tuhoy sa pag-revoke sang business permit sang anay electric distributor sa syudad sang Iloilo.
Suno kay Tabud, ginahulat na lang niya sa subong kun ano ang mangin reply sang PECO.
Ang pagbawi sang business permit suno kay Tabud ang indi pa mahitso sa subong bangud sa ginapatuman nga Enhanced Community Quarantine.
Ang proseso sa pagbawi sang business permit ang maga-agi pa sa City Legal Office kag mismo si Iloilo City Mayor Jerry Treñas ang opisyal nga maga-anunsyo sang revocation.
Samtang, wala sang ideya ang More Electric and Power Corporation tuhoy sa notice of revocation sang Business Permit sang Panay Electric Company.
Sa interview sang Bombo Radyo kay Roel Castro, President kag Chief Executive Officer sang More Electric and Power Corporation, iya ginpahayag nga sa subong, ang MORE Power ang legal nga distribution utility sa syudad sang Iloilo.
Suno kay Castro, may yara sang prangkisa kag Certificate of Certificate of Public Convenience and Necessity ang MORE Power kag ang tawo na mismo ang magadesisyon kun sin-o ang ila patihan sa pagbayad sang bill.
Ginpahayag ni Castro nga kun may yara sang mga nakabayad sa PECO pagkatapos sang Pebrero 29, sila na lang mismo sa MORE ang magakolekta sang bayad gikan sa anay distribution utility apang kinahanglan nga ang konsomidor ang magpakita sang resibo kag authorization form.
