ILOILO CITY – Nanindugan ang Iloilo City Government nga nagakadapat nga sundon ang protocol sang Inter-Agency Task Force may kaangtanan sa pagrepatriate sang mga Overseas Filipino Workers.
Ini matapos nga ginkaakig ni Iloilo City Mayor Jerry Treñas ang pagdungka sang barko sa syudad gikan sa Cebu sa diin nakasakay ang isa ka nagpositibo sa COVID-19 bangud wala ginsunod sang Overseas Workers Welfare Administration ang mga pagsulundan nga ginhatag sang syudad kag Inter-Agency Task Force.
Sa interview sang Bombo Radyo kay Dr. Roland Jay Fortuna, focal person for Coronavirus Disease 2019 (COVID-19) sang Iloilo City Health Office iya ginpahayag nga nakigkita na sila sa Overseas Workers Welfare Administration, Office of the Civil Defense kag iban pa nga mga ahensya agud istoryahan kun ano ang mga nagakadapat nga himuon antes batunon sang syudad ang mga repatriates.
Suno kay Fortuna, kun basehan ang memorandum sang Department of Health may kaangtanan sa pagrepatriate sa mga Overseas Filipino Workers iya ginpahayag nga katungdanan ini sang Overseas Workers Welfare Administration.
Dugang sang natungdan, antes nga papulion ang mga repatriates nagakadapat nga makig-angot anay sa Department of Tourism, Department of Labor and Employment kag Bureau of Quarantine.
Samtang ang katungdanan lang sang City government amo ang batunon ang mga repatriates apang nagakadapat nga magsunod sa gihapon sa mga pagsulundan nga amo ang nagakadapat nga residente sila sa syudad sang Iloilo ukon sa probinsya.
Ika-duha, nagakadapat nga nakatapos na sang 14 ka adlaw nga quarantine sa ginhalinan nila nga lugar kag pag-abot sa Iloilo nagakadapat nga magpaidalom liwat sa 14 ka adlaw nga quatantine agud masigurado nga negatibo sila sa virus.
Sa tion nga indi ini masunod, indi mahimo nga batunon sila sang Iloilo City Government.
