ILOILO CITY – Natalana kun tani nga magpauli sa Iloilo kagab-i, Abril 25, ang isa ka batch sang Ilonggo Overseas Filipino Workers nga na stranded sa Metro Manila apang wala nadayon bangud sa kakulangan sa dokumento santo sa ginapangayo sang Overseas Workers Welfare Administration
Sa interview sang Bombo Radyo kay Ivy Porras Cabillon, isa sa mga na stranded nga Overseas Filipino Worker, iya ginpahayag nga ulihi na lang sila ginpahibalo nga kinahanglan nila magpasa sang letter of acceptance gikan sa Local Government Unit kun sa diin sila magapauli.
Suno kay Cabillon, wala sila nakapasa sang nasambit nga dokumento bangud magluwas nga Sabado kahapon, nabudlayan sila kun sin-o ang magakuha sini bangud sa Enhanced Community Quarantine.
Ginpahayag ni Cabillon nga kun tani, ginpahibalo sila sang mas temprano agud nga ila ini nga naproseso kag mahimo na nga makapauli.
Gin-athag naman ni Iloilo City Mayor Jerry Treñas nga wala siya ginpahibalo sang Overseas Workers Welfare Administration nga may yara sang batch sang Overseas Filipino Workers nga natalana nga magpauli kagab-i.
Sa interview sang Bombo Radyo kay Treñas, iya ginpahayag nga nagahulat siya sang koordinasyon gikan sa Overseas Workers Welfare Administration.
Suno sa alkalde, ipahitso pa niya sa nasambit nga ahensya kun paano mapadasig ang pagpapauli sa stranded nga OFW.
