ILOILO CITY – Personal nga naghingyo sang pasaylo si Director Jose Roberto Nuñez, Chairperson, Western Visayas Inter-Agency COVID-19 kay Iloilo City Mayor Jerry Treñas kag Iloilo Governor Arthur Defensor Jr.
Ini matapos ang nangin pahayag sang alkalde kag gobernador nga wala sila sang nabaton nga koordinasyon gikan sa task force may kaangtanan sa pagpauli sang mga Ilonggo Overseas Filipino Workers nga nastranded sa Metro Manila.
Sa interview sang Bombo Radyo kay Nuñez, iya ginpahayag nga naka istorya na sya kay Mayor Jerry Treñas kag Governor Arthur Defensor Jr., kag personal sya nga naghingyo sang pasaylo sa ila nangin kakulangan.
Nagpasalig ang natungdan nga indi na maliwat pa ang pila ka mga butang nga wala nila matalupangdanan kag gina siguro niya nga magapakig-angot anay sila sa talatapan sang alkalde kag gobernador agud ma istoryahan ang mga kaangay nga isyu.
Suno kay Nuñez, may yara man sang duha ka tiglawas nga Local Government Unit ang Iloilo City Government kag Iloilo Province kada magpatigayon sila sang pagsinapol.
Nahibaluan nga natalana na nga magpauli subong nga adlaw Abril 29, sa syudad sang Iloilo ang isa ka batch sang mga Ilonggo Overseas Filipino workers nga na stranded sa Metro Manila.
Samtang nagpasalig naman si Nuñez, nga preparado na ang tanan sa pag-abot sang mga Overseas Filipino Workers subong nga adlaw.
Suno kay Nuñez, nakig-angot na sila sa Philippine Coastguard kag Maritime Authority nga amo ang maga monitor sang lokasyon sang mga OFW.
Dugang sang natungdan, nakahanda naman ang mga hotels nga amo ang mangin quarantine facilities sang mga OFW nga magapaidalom sa 14 ka adlaw nga quarantine.
Gin-athag ni Nuñez nga ang mga OFW lang nga nagnegatibo sa rapid test kag kompleto ang dokumento ang ginpahanagutan nga makasakay sa barko kag makapauli sa Iloilo.
