ILOILO CITY– Indi na magpasugot si Iloilo City Mayor Jerry Treñas nga magpasulod sang repatriated Overseas Filipino Workers nga ginpatigayun sang iban nga opisyal magluwas sa Regional Inter-Agency Task Force.
Sa interview sang Bombo Radyo kay Treñas, iya ginpahayag nga indi na siya maluyag nga may iban nga naga-intra bangud nagakumplikado ang proseso.
Suno kay Treñas, nagasala-sala na sila kun bala kay Iloilo City Lone District Rep. Jam Jam Baronda ukon kay Office of Civil Defense 6 Director Jose Roberto Nuñez magapakig-angot tuhoy sa repatriation.
Ginpahayag ni Treñas nga nagakadapat nga ang tanan nga tikang ang napahibalo sa Regional Inter-Agency Task Force nga amo ang may daku nga katungdanan.
Gin-athag man sang alkalde nga wala sang ‘misinterpretation’ sa intensyon ni Baronda apang sila sa Iloilo City Government ang magapakig-angot na lang sa Regional Inter-Agency Task Force.
Ginapangayo lang niya suno kay Treñas nga papulion ang Overseas Filipino Workers nga wala sang problema nga matabo.
