ILOILO CITY – Liwat nga i-validate sang Iloilo City Social Welfare and Development Office ang listahan sang mga benepesaryo sang Social Amelioration Program sa Brgy. Kamalig, Jaro, Iloilo City.
Ini matapos nga nagreklamo ang pila ka mga pumuluyo bangud ginapahayag nga nalakip sa listahan ang bata sang ila nga punong barangay.
Sa interview sang Bombo Radyo kay Teresea Gelogo, Focal Person sang Iloilo City Social Welfare and Development Office iya ginpahayag nga basta wala lang naga-istar sa isa ka balay si Punong Barangay Nestor Loma kag iya bata kag wala ini sang trabaho mahimo nga malakip ini sa listahan sang makabaton sang ayuda.
Suno kay Gelogo, agud makasiguro kun bala kwalipikado ang tanan nga yara sa listahan sang nasambit nga barangay igavalidate nila ini liwat.
Sa tion nga mahibaluan nga may yara sang indi kwalipikado nga nalakip sa listahan, indi na ini makabaton sa ika-duha nga hugnat kag ipabalik ang P6,000 nga ayuda nga una na nila nga nabaton.
