ILOILO CITY – Gin-athag sang punong barangay sang Brgy. Naslo, Pototan, Iloilo ang ginapahayag anomaliya sa pagpanghatag sang Social Amelioration Program sa ila barangay.
Sa interview sang Bombo Radyo kay Punong Barangay Liezel Hablo Supremo sang nasambit nga lugar, iya ginpahayag nga ginlista lang niya ang tanan nga pumuluyo sa ila barangay lakip man ang iya bana kag iban pa apisar nga may pension agud lang ma pun-an ang 373 ka slot nga ginhatag sa ila sang Department of Social Welfare and Development.
Suno kay Supremo, nagsalig sila nga iga validate pa sang Department of Social Welfare and Development ang nasambit nga listahan agud mahibaluan kun sin-o ang mga kwalipikado nga makabaton sang ayuda.
Dugang sang natungdan, matapos nga navalidate ang ila listahan ginkakibot niya nga nalakip ang iya bana sa nakabaton sang ayuda.
Santo sa pahayag ni Supremo pat-ud niya mismo nga indi kwalipikado ang iya bana bangud punong barangay sya gani gilayon niya nga ginpabalik ang kwarta nga nabaton kun tani sang iya bana lakip man ang iya mga barangay officials nga nalakip man sa mga nakabaton sang nasambit nga ayuda.
