Nagapati ang Malacañang nga isa lang ka panghaylo sa trabaho sang presidente ang petisyon nga ginpasaka sang abogado nga si Atty Dino de Leon nga ipagwa sang presidente ang iya pinakabag-o nga pyschological examination results, health bulletins kag medical records.
Suno kay Presidential Spokesman Harry Roque, target man sang petisyon amo ang gub-on ang pagsalig sang publiko sa liderato ni Presidente Duterte ilabi pa subong nga nagapangatubang sang krisis ang pungsod nga gintuga sang Coronavirus Disease 2019.
Dugang pa sang natungdan, wala sang legal nga basehan ang nasambit nga petisyon.
Nahibaluan nga sa boto nga 13-2, ginbasura sang Korte Suprema ang nasambit nga petisyon.
Madumduman nga sang Abril 13 subong lang nga tuig nagpasaka man si De leon sang petisyon sa diin gingamit niya nga basehan ang Section 12 Article VII sang Constitution.
Nakasaad diri nga kinahanglan mahibaluan sang publiko ang kondisyon sang ikaayong lawas sang presidente ilabi pa kun may yara ini sang balatian.
