ILOILO CITY – Gilayon nga ginpaidalom sa facility quarantine ang nag-abot nga Overseas Filipino Workers nga residente sang San Miguel, Iloilo kag na-stranded sa Metro Manila.
Sa interview sang Bombo Radyo kay San Miguel Mayor Marina Luz Gorriceta, iya ginpahayag nga naka facility quarantine na subong ang mga OFW sa ila evacuation center kag yara sa maayo nga kondisyon.
Suno kay Gorriceta, pag-abot sang mga OFW gilayon nila nga ginkuha ang resulta sang ila swab test kag magahulat pa sila sang tatlo tubtob lima ka adlaw antes mahibaluan ang resulta.
Dugang sang natungdan, kinahanglan pa nila nga tapuson ang 14 ka adlaw nga quarantine kag sa tion nga magnegatibo na ang ila resulta sa COVID-19 mahimo na sila makapauli sa ila tagsa ka mga panimalay.
Mahimo man nga bisitahon sang ila mga pamilya ang mga OFW apang kinahanglan lang mag obserbar sang physical distancing sa diin tubtob lang sila sa gwa sang gate kag ginadumilian nga makasulod sa pasilidad.
Mas ginhugtan man nila subong ang pagbantay sa 27 ka mga border checkpoints sa ila banwa sa diin halos 24 ka oras ang pagbantay sang mga opisyal agud masiguro nga indi na magsulod pa ang virus sa ila nga banwa.
