ILOILO CITY – Ginaduso ni Iloilo 1st District Rep. Janette Garin ang pagpasangkad sang testing facility sang pungsod agud matapna na ang paglapta sang Coronavirus Disease 2019 (COVID-19)
Suno kay Garin, tuman man ka atrasado ang pagpatigayon sang testing sa pungsod nga masami naga tuga sang pagkabalaka sa mga pumuluyo.
Dugang sang natungdan pila na ka bulan humalin sang nagsugod ang pandemic sa Pilipinas apang wala pa sa 1% sang Metro Manila ang napaidalom na sa testing.
Santo sa pahayag ni Garin, bilang anay tiglikom sang Department of Health kag bilang isa ka ordinaryo nga iloy sya mismo ang nagakabalaka sa sitwasyon sang pungsod bangud sa padayon nga pagsaka sang kaso sang COVID-19.
Bangud diri, gina duso ni Garin ang pagpasangkad sang testing facility sa Pilipinas lakip man ang pagdugang sang testing kits.
Suno kay Garin, nagakadapat man nga panubuon ang presyo sang COVID-19 testing package sang PhilHealth nga nagabalor P2,000 tubtob P8,000 nga amo ang pinaka mahal sa bilog nga kalibutan.
Ginpahayag ni Garin nga ang tuman ka mahal nga presyo sang testing ang pamatuod lang nga ginahingalitan sang gobyerno kag iban pa nga ahensya ang pandemic nga ginapangatubang sang pungsod.
Ginsuhesityon man ni Garin ang direkta nga pagbakal sang testing kits sa manufacturer agud mas makakinot ang Department of Health agud man malikawan ang mga negosyante nga nagahingalit sa sitwasyon.
