ILOILO CITY – Magapatigayon sang pagsinapol si Iloilo City Mayor Jerry Treñas, kaupod ang mga punong barangay sa syudad nga may yara sang problema may kaangtanan sa pagpanagtag sang Social Amelioration Program sang Department of Social Welfare and Development.
Sa interview sang Bombo Radyo kay Treñas, iya ginpahayag nga kun sya lang ang pamangkuton, natungdan sang maayo sang mga barangay officials ilabi na ang mga punong barangay ang ila katungdanan sa pagpanagtag sang nasambit nga ayuda sa ila tagsa ka mga lugar.
Suno kay Treñas, paga istoryahon niya ang mga punong barangay nga ginareklamo nga ginapahayag may kaangtanan sa mga anomaliya sa pagpanagtag sang nasambit nga ayuda agud maathagan kag mahatagan sang solusyon.
Samtang nagdangat naman sa halos tatlo ka libo ka mga benepesyaryo ang natigayon nga mahatagan sa ika ulihi nga adlaw sang pagpanagtag sang cash aid kahapon nga adlaw.
Suno kay Treñas, nagdangat lang sa 97% ang natigayon nila nga mahatagan bangud mabudlay na nga i-identify ang mga nabilin pa nga wala mahatagan.
Sa subong suno sa natungdan, wala pa niya nabaton ang sabat ni Presidente Rodrigo Duterte sa appeal letter nga iya ginpadala para sa 2nd tranche sang nasambit nga ayuda.
