ILOILO CITY – Nagdangat na sa 60% ang Public Utility Jeepneys sa syudad sang Iloilo ang nahatagan sang car pass.
Sa interview sang Bombo Radyo kay Land Transportation Franchising and Regulatory Board 6 Director Richard Osmeña, iya ginpahayag sa iya pagpakighinunaon kay Iloilo City Mayor Jerry Trenas, ginkasugtan nga dugangan pa ang mga jeep nga mahimo hatagan sang special permits agud nga makabyahe.
Suno kay Osmena, kun kulangon ang mga jeep, mahimo nga 100% ang hatagan sang special permit agud man indi na mabudalayan pa ang mga pasahero.
Ginpahayag ni Osmeña nga sa bahin sang Provincial buses, lauman nga 100% na ang magabyahe buwas, Hunyo 1, bangud tanan ang nahatagan na sang special permits.
Sa pihak sini, nagakadapat sa gihapon nga magsunod sa health protocols ang mga pasahero lakip man ang driver kag konduktor.
Likawan man ang pagpasa-pasa sang manifesto kun sa diin isa lang ka ballpen ang ginagamit sang mga pasahero kag ini ang posible mangin kabangdanan sang paglapta sang virus.
Sa subong, nagdangat sa halos 85% ang mga jeep nga sakop sang kooperatiba, rason nga nangin mas madasig ang pagproseso sang permit.
