ILOILO CITY– Nagreklamo ang isa ka asosasyon sang jeep sa syudad sang Iloilo bangud nga wala pa sila sa gihapon nakabyahe bangud kinahanglan pa nila magpamiyembro sa kooperatiba agud makakuha snag special permit gikan sa Land Transportation Franchising and Regulatory Board.
Sa interview sang Bombo Radyo kay Boy Agapolo, driver sang jeep nga may ruta SM City-City Proper, iya ginpahayag nga halos tatlo na ka bulan nga wala siya nakabyahe bangud nga indi man siya miyembro sang kooperatiba.
Suno kay Agapolo, problema nila sa subong kun paano makabayad ang operators bangud wala pa sila nakasugod sa pagbyahe.
Kun tani suno kay Agapolo, tugutan sila nga makabyahe samtang ginaproseso ang ila membership sa kooperatiba.
Suno naman kay Raymundo ‘Boyet’ Parcon, Presidente sang Iloilo City Loop Alliance of Jeepney Operators and Drivers Association, ang pagpamiyembro sa kooperatiba agud makakuha snag special permit ang santo sa memorandum sang Land Transportation Franchising and Regulatory Board.
Suno kay Parcon, kun ang driver ang nagaproblema sa kun paano sila makabyahe, mahimo man siya nga makabulig agud maistoryahan kag mapalastar sang maayo ang mga solusyon.
Sa bahin naman sang membership fee nga P5,000, mahimo man ang down payment kag magpirma na lang sang promisory note.
