ILOILO CITY – Nagakadapat nga may yara sa gihapon sang koordinasyon sa Local Government Unit ang pagpauli sang mga Locally Stranded Individuals (LSI).
Ini ang sabat ni National Task Force Against COVID-19 Chief Implementer Secretary Carlito Galvez Jr. sa palamangkutanon ni Iloilo Governor Arthur Defensor Jr. may kaangtanan sa proseso sang pagpauli sang mga locally stranded individuals kadungan man sang iya pagpadulong sa Iloilo kahapon nga adlaw.
Suno kay Galvez, dako ang mangin katungdanan sang Local Government Unit nga magabaton sa mga locally stranded individuals bangud naga kinahanglan nga tsekyaron nila nga kun gikan sa high risk areas ang LSI nagakadapat nga may yara sila sang health certificate nga amo ang pamatuod nga nakapaidalom sila sa rapid test kag negatibo ang ila resulta.
Nagakadapat ma nga nakatapos sila sang 14 ka adlaw nga quarantine agud masiguro nga hilway sila sa makamamatay nga virus.
Gin-ako naman sang tiglikom nga ginakulang na ang ikasarang sang national government bangud sa pagrepatriate sa mga Overseas Filipino Workers sa diin ginalauman nga may yara pa sang dugang nga 500,000 tubtob 700,000 ka mga OFW ang magapauli subong nga tuig kadungan sang pagpasarado sa 70% sang ekonomiya sang Middle East.
Madumduman nga una na nga nangayo sang pasaylo si Galvez tuhoy sa padasigay nga repatriation sang linibo ka mga nga OFW bangud sa COVID-19.
