ILOILO CITY- Wala sang kalain sang buot ang Iloilo City Police Office sa pamilya sang mga biktima sang twin shooting sa Syudad sang Iloilo nga nagdangop sa National Bureau of Investigation rason nga natumod na ang mga suspek nga responsable sa krimen.
SPOKESPERSON,
ILOILO CITY POLICE OFFICE
Sa interview sang Bombo Radyo kay Police Capt. Shella Mae Sangrines, tagpamaba sang Iloilo City Police Office , iya ginpahayag nga may koordinasyon man sa ila ang pamilya nanday Alain Muller kag Delfin Britanico may kaangtanan sa pagdangop nila sa National Bureau of Investigation.
Magluwas diri,ginpahayag ni Sangrines nga nahibaluan man sang pamilya kag sang National Bureau of Investigation nga wala gina-untatan sang Iloilo City Police Office ang pag-asikaso sa nasambit nga kaso.
Matandaan nga gin-file na ang kaso nga Murder kag Theft sa mga pulis nga sanday PCpl. Jerry Carmelotes Villanueva kag PCpl. Joseph Andrew Poneles Joven kag sa duha ka mga wala pa makilal-an nga mga suspek.
Si Villanueva ang yara na sa kustodiya sang kapulisan samtang si Joven ang nagapabilin naman nga at-large.
Suno kay Sangrines, si Joven ang ulihi nga na-assign sa Iloilo City Holding and Accounting Unit apang nangin AWOL ukon Absence Without Leave ang status sini kag wala gid ma- locate tubtob subong.
