ILOILO CITY – Nagawangal ang mga residente sang Buenavista, Guimaras matapos 13 ka adlaw nga wala maswelduhan sang AC Energy.
Ang nasambit nga mga residente ang ginkuha sang AC Energy pinaagi sa cash for work agud magpaninlo sa mga lugar nga apektado sang oil spill matapos naglupok ang ila power barge.
Sa exclusive interview sang Bombo Radyo kay Mayor Eugene Reyes, iya ginpahayag gilayon niya nga ginpalab-ot kay Mr. Gabino Ramon Mejia, pinuno sang Plant Operations sang AC Energy.
Suno kay Mejia, gilayon man nga ginpasalig ni Mejia nga mahatag ang sweldo sang nasambit nga mga residente.
Samtang, ginkumpirma man sang alkalde nga wala pa sa gihapon maubos kuha ang bunker fuel nga nagtapik sa mga mangroves ukon bakhawan sa ila lugar.
Kaangot sini, ginpasalig man sang AC Energy suno sa alkalde nga may action plan sila agud maubos tinlo ang mga bakhawan kag hunasan nga naapektuhan sang bunker fuel.
Sa kompensasyon naman, ginahisto pa ang pinal nga listahan sang tanan nga mga apektado nga pumuluyo ilabi na ang mga manugpangisda.
