ILOILO CITY-Nakapakig-angot pa sa iya asawa ang Ilonggo seafarer nga isa sa mga crew sang Gulf Livestock 1 antes naglugdang ang barko sa kadagatan sang Japan bangud sa bagyo.
Sa exclusive interview sang Bombo Radyo Iloilo kay Yohan Mae Garvilles , manghud sang seaman nga si Richard Garvilles,31, tumandok sang Particion, Guimbal apang nagaistar na sa Brgy. Lubacan sa amo nga banwa, iya ginpahayag nga nakapanugid pa ang Ilonggo seafarer sa iya asawa nga ginsulod na sang tubig ang ila barko antes ini naglugdang.
Suno kay Yohan Mae, samtang delikado na ang ila sitwasyon,wala gilayon nakaabiso ang kapitan sang barko tuhoy sa ila himuon.
Ginkatingala naman sang asawa nga wala na nakabalos sa iya mensahe si Garvilles kag didto na nila nahibaluan ang balita nga naglugdang ang barko nga ginasakyan sang iya bana.
Si Garvilles ang anom na ka tuig nga seaman kag nakasakay ini liwat sang damlag lang matapos ang pila ka bulan nga paghulat bangud nga naabtan ini sang lockdown bangud sa COVID-19 pandemic.
