ILOILO CITY- Hugot nga ginadumilian sa estado sang Mississipi ang campaign propaganda sa adlaw sang eleksyon sa Nobyembre 3.
Sa report ni Bombo International Correspondent Sonia Provido Short direkta sa Mississippi sa Estados Unidos, iya ginpahayag nga iligal sa estado ang magpadulong sa polls nga may campaign memorabilia nga nagasuksok sang bayo nga may nakabutang nga “Make America Great Again” nga slogan ni US President kag Republican nga si Donald Trump ukon “Build Back Better” nga iya naman ni Joe Biden nga isa ka Democrat.
Suno kay Short nga isa ka insurance analyst sa Mississippi, seryoso ang mga nagadumala sang eleksyon sa nasambit nga estado kun campaign propaganda ang istoryahan.
Paathag niya, base sa layi sa Mississippi, pagsupak sa kasuguan ang himuon sang sin-o man nga kandidato para sa elective office, ukon tiglawas sang kandidato ukon sin-o man nga proponent ukon opponent sang constitutional amendment, lokal nga mga isyu ukon iban nga tikang nga nakaimprinta sa balota nga ipatakip ukon ipanagtag sa sulod sang 150 ka tapak nga distansya gikan sa entrance sang polling precinct.
May kaangtanan naman sa presidential race sa tunga ni Trump kag Biden, ginpahayag ni Short nga ginagamit nga basehan subong sang pumuluyo amo ang hinimuan ni Trump sa 47 ka bulan nga pagpamuno kag hinimuan ni Biden sa 47 ka tuig nga karera sa pulitika.
Suno pa sa iya, madamo ang nagasiling nga mas madamo ang hinimuan ni Trump sa iya 47 ka bulan bilang presidente kun ipaanggid sa masobra apat ka dekada ni Biden bilang opisyal sang gobyerno.
Dugang niya, madamo man ang dismayado sa plano ni Biden nga defunding sa mga pulis.
Sa malip-ot nga pulong suno kay Short, mas dako ang tsansa ni Trump nga magdaug sa Mississippi nga may yara sang anom ka electoral votes.
