ILOILO CITY- Nagpaathag ang Department of Social Welfare and Development Region 6 may kaangtanan sa audit observation report sang Commission on Audit para sa 2019 sa diin nakit-an ang pila ka kwestyonable nga mga transaksyon.
Sa interview sang Bombo Radyo kay OIC Director Evangeline Felicio sang Department of Social Welfare and Development Region 6, ginsabat niya ang finding tuhoy sa lapses sa
pagpatuman sang Social Pension for Indigent Senior Citizen nga nagalab-ot sa P796, 650,000.
Suno kay Felicio, nag- spillover ang 2019 sa 2020 bangud sang Hunyo 2019 lang natapos ang revalidation kag paglimpyo sang listahan sang mga beneficiaries.
Ginpahayag niya nga nabaton naman sang mga nagakadapat nga benepisyaryo ang ila nga pensyon.
Sa observation report naman nga walo ka mga proyekto nga nagabalor P12.956M gikan sa 26 ka mga sub-projects sa idalom sang Kapit-Bisig Laban sa Kahirapan-Comprehensive and Integrated Delivery of Social Services(KALAHI CIDSS) nga gin-inspect kag nakit-an nga may diperensya, gin-ako ni Felicio nga may mga depekto gid man apang ini ang ginpakaayo kag nakompleto na magluwas lang sa isa nga yara pa lang sa procurement process.
Suno sa iya, naghinay lang ang pagpakaayo sang depektoso nga mga proyekto bangud man sa epekto sang COVID-19 pandemic.
May kaangtanan naman sa audit report nga may deficiences sa pagpatuman sang Sustainable Livelihood Program para sa Calendar Year 2019 para sa rehiyon 6 nga nagabalor P345.2M, ginpahayag ni Felicio nga 45% sa nasambit nga kantidad ang na-liquidate na samtang ang nabilin nga 55%, padayon pa ang implementasyon sang Local Government Unit.
Suno sa natungdan, indi man madali-dali ang transfer of funds bangud malawig ang social preparation agud masiguro man nga mangin madinalag-on ang ginapatuman nga proyekto.
