Ginmanduan sang inter-agency task force ang tanan nga mga establisyemento nga magamit sang Stay Safe application kag sang Quick Response ukon QR Code agud magtipon sang data sa mga naclose contact ang mga COVID-19 patients.
Suno kay Presidential Spokesperson Atty. Harry Roque, nakasugtan sang inter-agency task force, nga aprubahan ang rekomendasyon sang Office of the Cabinet Secretariat nga ipatuman ang Safety Seal Certification Program.
Ginpahayag ni Roque nga tanan nga mga opisina sang gobyerno, private companies, hotels, business establishments kag public transportation units ang required nga ipatuman ang Safety Seal.
Gin-athag naman ni COVID-19 testing czar Vince Dizon nga ang Stay Safe app ang libre lang nga madownload kag wala nagakinahanglan sang mobile prepaid load agud mag-function.
Sa bulig sang nasambit nga application, ang mga users ang mahimo magkuha sang picture sang QR codes sa mga malls, bangko, restaurants, trains kag bus, sa baylo nga mag-fill up sang contact-tracing sheets.
Ang nasambit nga application ang magahatag sang notifications kun nakapadulong ang isa ka tawo sa lugar sa diin may nagpositibo sa COVID-19.
