ILOILO CITY – Magapanagtag sang libre nga COVID-19 vaccine ang Florete Group of Companies sa linibo ka mga empleyado sa idalom sang kumpaniya sa bilog nga Pilipinas.
Ini ang kasunod man sang panawagan ni Iloilo City Mayor Jerry Treñas sa mga pribado nga kumpaniya nga hatagan sang tested, proven kag de-kalidad nga vaccine.
Suno kay Dr. Rogelio Florete, Chairman sang Florete Group of Companies, matapos nabatian niya ang panawagan sang alkalde, wala siya nagduha-duha sa pagdesisyon sa paghatag sang bakuna sa tanan nga mga regular nga empleyado sang kumpaniya.
Ginpahayag ni Dr. Florete nga nahibaluan niya nga madamo sang nga galastuhan ang syudad sang Iloilo kag ang gobyerno rason nga indi na niya luyag pa nga maghatag sang kabug-at sa alkalde kag mangin sa mga empleyado nga magasto pa sang dako nga kantidad para sa bakuna.
Duha ka shots sang COVID-19 vaccine ang ihatag sang libre ni Dr. Florete sa diin ginpahayag sini nga dako ini nga bulig agud indi na magmasakit ang mga empleyado sang kumpaniya.
Nagpanawagan man si Dr. Florete sa iban pa nga mga kumpaniya mga magsunod man sa panawagan sang alkalde.
Gin-athag man sang natungdan nga hatagan sang kinamatarong ang kada empleyado kun luyag niya ukon indi nga magbaton sang COVID-19 vaccine.
Ang Florete Group of Companies, ang ginabug-usan sang Media (Bombo Radyo/ Staf FM), Banking (Queenbank), Real Estate, Water (FloWater), Mall operation, Aquaculture kag Pawnshop and Jewerly (R. Florete).
