ILOILO CITY – Hugot nga ginabalabagan sang Iloilo City Department of the Interior and Local Government (DILG) ang pagpatigayon sang online bulang sa syudad.
Sa interview sang Bombo Radyo kay Iloilo City DILG Director Oscar Lim Jr., iya ginpahayag nga sa idalom sang DILG Memorandum Circular No. 2020-140 nga amo ang guideline sa pagpabalik sang pabulang, nasaad nga ginadumulian ang live telecast kag online betting.
Suno kay Lim, bangud tuman ka istrikto ang pagsulundan, posible lamang ang online nga bulang kag pustahanay kun magbalik na sa normal ang tanan.
Matandaan nga sa Resolution 79, Series of 2020 sang Inter-Agency Task Force, nakasaad nga ginapasugtan ang cockfighting operations sa mga lugar nga yara sa Modified General Community Quarantine apang subject sa istrikto nga health kag safety protocols.
Sa idalom sini nga pagsulundan, indi pwede ang in-person audience, online ukon remote betting, kag pati na ang live broadcasting ukon telecasting sang cockfights.
Nahibaluan nga wala maimbitahan ang ila talatapan sa ginpatigayon nga committee hearing sang Iloilo City Council tuhoy sa hingyo nga prangkisa sang operator agud magpatigayon sang online bulang sa syudad sang Iloilo.
Ang nasambit nga komitiba ang ginapamunuan ni Iloilo City Councilor Jojo Javellana nga amo ang chairman sang Committee on Games and Amusement sang Sangguniang Panlunsod.
