ILOILO CITY – Hulaton na lang sang Land Transportation Office Region VI ang official order halin sa central office kag sa Department of Transportation (DOTr) may kaangtanan sa mga pagsulundan sa private motor vehicle inspection system (MVIS).
Ini ang kasunod sang mandu ni Presidente Rodrigo Duterte nga indi na mandatory ang MVIS; buot silingon, wala sang bag-o kag dugang nga sukot para sa nagaparehistro sang ila nga salakyan.
Sa interview sang Bombo Radyo kay LTO Region VI director Eric Lenard Tabaldo, iya ginpahayag nga sundon nila ang order halin sa ibabaw bangud implementing body lamang ang LTO.
Wala man napunggan ni Tabaldo nga magpautwas sang kalain sang buot kun ngaa sila ang ginapakamalaot sang publiko sa kontrobersyal nga MVIS.
“Masunod kami, eh. Kun ano ang order, ginasunod man namon. Ang LTO bala, implementing [agency] lang bala kami. Tingala kami nga kami ang ginawaswasan. Naga-implement lang bala kami. Kaluluoy man ang LTO,” pahayag ni Tabaldo kag nagapanindugan nga nagapatuman lang sila sang layi.
Sa desisyon nga indi man mandatory ang MVIS, indi man directly affected ang Iloilo suno kay Tabaldo bangud wala pa man diri sang bag-o nga inspection centers.
