ILOILO CITY- Naglab-ot na sa 100 ka tawo ang nalakip sa contact tracing kasunod sang pagpositibo sa COVID-19 sang 18 ka mga indibidwal sa Barotac Viejo, Iloilo.
Sa interview sang Bombo Radyo kay Mayor Nielo “Bong-Bong” Tupas, sa 18 ka kaso, 12 ang gikan sa Iloilo 3rd District Engineering Office sang Department of Public Works and Highways (DPWH), tatlo ang mga vendors sa Banate Public Market kag ang tatlo ang close contacts sang mga vendors.
Suno kay Mayor Tupas, symptomatic ang iban sa nasambit nga mga pasyente nga nagaeksperyensiya sang hilanat, pagkadula sang panabor kag panimaho.
Ginpaidalom naman sa quarantine ang kapin 100 nga mga close contacts nga nakuhaan na sang RT-PCR test kag ginahulat nalang ang resulta.
Pahayag pa sang alkalde, wala pa matumod kon sa diin naghalin ang kaso apang ginalantaw nga posible nga sa DPWH naghalin ang infection kag latnanay.
Gilayon naman nga ginpaidalom sa disinfection ang DPWH kag igasirado ini sa sulod sang pila ka adlaw .
