OTON, ILOILO – Subong nga Lent Season, nagapangagda ang local government unit sang Oton, Iloilo sa publiko nga magsakripisyo sang gamay paagi sa pagdonar sang dugo kadungan sang bloodletting activity nga patigayunon bwas, Marso 26.
Ini nga bloodletting activity ang himuon kaupod ang Dugong Bombo sang Bombo Radyo Philippines kag ang Western Visayas Medical Center (WVMC).
Sa interview sang Bombo Radyo kay anay Oton, Iloilo Sanguniang Bayan Member Jafet Salinas, bloodletting activity kag COVID-19 focal person, iya ginpahayag nga may nagkomiter na nga mga grupo nga magaupod sa aktibidad.
Magluwas sang sakripisyo subong nga Lent Season, ginapahangop man sa mga pumuluyo ang pagkinahanglan sa dugo bangud sang mga emerhensya nga nagakatabo sa tunga sang pandemya.
Ang aktibidad ang magaumpisa las 8:00 sa aga sa Puregold Mall sa Poblacion South sa amo nga banwa.
Sundon ang tanan nga minimum health protocols batok sa COVID-19 sa nasambit nga aktibidad.
