BANATE, ILOILO – Gindakop sang mga pulis ang isa ka 36 anyos nga manug-ihaw sang baboy sa Brgy. Bariga, Banate, Iloilo bangud sang ginapahayag paghupot sang indi rehistrado nga mga armas luthang.
Ang arestado amo si Lemuel Caporte nga ginapahayag may pwesto sa merkado sa amo nga banwa.
Sa interview sang Bombo Radyo kay Pol. Lt. Randy Lambungan, hepe sang Banate Municipal Police Station, iya ginpahayag nga nakuha sa possession sang nadakpan ang isa ka unit sang home-made 12 gauge shotgun, isa ka unit sang caliber 45 pistol, isa ka steel magazine sang caliber 45 pistol, duha ka bala sang 12 gauge shotgun, kag 30 ka bala sang caliber 45 pistol.
Antes gin-aresto, may rekord na nga daan si Caporte sa mga pulis bangud sa ginapahayag pagpalupok sang pusil samtang hubog.
Santo sa panaysayon ni Caporte sa mga pulis, sa Dingle niya nakuha sang nagligad pa nga tuig ang iya nga armas.
Sa subong, yara si Caporte sa Criminal Investigation and Detection Group (CIDG)-Iloilo custodial facility kag natalana nga mag-atubang sa kaso nga paglapas sa Republic Act (RA) 10591 ukon Comprehensive Firearms and Ammunition Regulation Act.
